நம் வாழ்க்கையில் புயல்களும், சோதனைகளும், எதிர்பாராத போராட்டங்களும் வரும்போது, மனம் இயல்பாகவே கலங்குகிறது.

பிரச்சினை தீர்ந்தால்தான் சமாதானம் வரும் என்று நாம் நினைக்கிறோம். ஆனால் தேவசமாதானம் என்பது பிரச்சினைகள் இல்லாத நிலை அல்ல; பிரச்சினைகளின் நடுவிலும் தேவனை நம்புவதால் கிடைக்கும் அமைதி.

புயல் வீசினாலும் உள்ளத்தில் தைரியம் நிலைத்திருப்பதே “எல்லாப் புத்திக்கும் மேலான” சமாதானம்.

இயேசு தமது சீடர்களிடம்,
சமாதானத்தை உங்களுக்கு வைத்துப்போகிறேன், என்னுடைய சமாதானத்தையே உங்களுக்குக் கொடுக்கிறேன், உலகம் கொடுக்கிறபிரகாரம் நான் உங்களுக்குக் கொடுக்கிறதில்லை. உங்கள் இருதயம் கலங்காமலும் பயப்படாமலும் இருப்பதாக.
யோவான் 14:27
“என்று கூறினார். உலகத்தின் சமாதானம் சூழ்நிலைகள் சாதகமாக இருக்கும்போது கிடைக்கிறது; ஆனால் கிறிஸ்துவின் சமாதானம் சூழ்நிலைகள் சாதகமாக இல்லாதபோதும் இருதயத்தில் நிலைத்திருக்கிறது.

உலகம் தர முடியாத சமாதானத்தை இயேசு தருகிறார்; அவர் தரும் சமாதானத்தை உலகம் பறிக்க முடியாதபடி அவர் காக்கிறார்.

பவுல் சிறைச்சாலையில் இருந்தபோது இந்த சமாதானத்தைப் பெற்றவராக பிலிப்பியருக்கு இதனை எழுதுகிறார்.

ஆகவே இது சூழ்நிலையிலிருந்து வரும் சமாதானம் அல்ல; கிறிஸ்துவுடனான உறவிலிருந்து வரும் சமாதானம்.

“காத்துக்கொள்ளும்” என்ற வார்த்தை ஒரு இராணுவக் காவலைப் போன்றது. நமது இருதயத்தையும் சிந்தனைகளையும் பயம், கலக்கம், நம்பிக்கையின்மை ஆகியவற்றிலிருந்து தேவசமாதானம் அரணாக நின்று காக்கிறது.

இந்த சமாதானத்தை அனுபவிப்பதற்கான வழியையும் பவுல் கூறுகிறார்: “ஒன்றுக்குங் கவலைப்படாமல்... ஜெபத்தினாலும் வேண்டுதலினாலும்... தேவனுக்குத் தெரியப்படுத்துங்கள்” (பிலிப்பியர் 4:6).

கவலை நமது பாரத்தை நாமே சுமக்கச் செய்கிறது; ஜெபம் அந்தப் பாரத்தை தேவனிடம் ஒப்படைக்கச் செய்கிறது.

இன்னும் பதில் கிடைக்காதபோதும் ஸ்தோத்திரம் செலுத்துவது, “எனக்கு வழி தெரியவில்லை; ஆனால் என் எதிர்காலத்தையும் என் வாழ்க்கையையும் அறிந்த தேவனை நான் நம்புகிறேன்” என்ற விசுவாசத்தின் வெளிப்பாடு.
அதனால், இன்று உங்கள் இருதயத்தை கலங்கச் செய்யும் எந்தப் பாரமாக இருந்தாலும் அதை மீண்டும் மீண்டும் சிந்திக்காமல், ஜெபமாக மாற்றுங்கள்.

சூழ்நிலை மாறுவதற்கு முன்பே தேவன் நமது உள்ளத்தை மாற்ற முடியும். அலைகள் உயர்ந்தாலும் கிறிஸ்து நம்மோடு இருக்கிறார். எல்லாவற்றிற்கும் பதில் கிடைக்காமல் இருக்கலாம்; ஆனால் எல்லாவற்றிற்கும் மேலான தேவன் நம்மோடு இருக்கிறார்.

“தேவனுடைய சமாதானம் என்பது புயல் இல்லாத வாழ்க்கை அல்ல; புயலின் நடுவில் தேவனுடைய பிரசன்னத்தை உணர்வதாகும்.
உங்கள் இருதயத்தையும் சிந்தனைகளையும் கிறிஸ்துவிடம் ஒப்படையுங்கள். உலகம் கொடுக்க முடியாத கிறிஸ்துவின் சமாதானம், மனித புத்திக்கு எட்டாத விதத்தில் உங்களை காத்துக்கொள்ளட்டும்.
அருட்பணி பங்காளர்கள் அனைவருக்கும் புதிய மாதத்தின் வாழ்த்துக்களை தெரிவித்துக் கொள்கிறேன்.

கடவுளின் அருளும் அவர் தரும் உண்மை சமாதானமும் நம் இருதயத்தை நிரப்பட்டும்.