வாழ்க்கையைத் தொடங்கும்போது பாதை தெளிவாகத் தெரிந்திருக்கலாம். ஆனால், பயணம் நீளும்போது சில சந்தர்ப்பங்கள் நம்மைத் தடுமாறச் செய்கின்றன. எதிர்பாராத பிரச்சினைகள், மனிதர்களின் வார்த்தைகள், தோல்விகள், அவசர முடிவுகள், எதிர்காலத்தைப் பற்றிய பயம் இவை எல்லாம் நம்மை நாம் செல்ல வேண்டிய பாதையிலிருந்து விலகச் செய்யலாம். நாம் வலதுபுறம் சாய்ந்தாலும், இடதுபுறம் சாய்ந்தாலும், “வழி இதுவே; இதிலே நடவுங்கள்” என்று தேவன் இன்னும் பேசிக்கொண்டிருக்கிறார். சில நேரங்களில் அவர் நம்மை முன்னால் சென்று வழிநடத்துகிறார்; சில நேரங்களில் பின்னால் இருந்து எச்சரிக்கிறார்; சில நேரங்களில் நாம் நிற்க வேண்டிய இடத்தில் நிறுத்துகிறார். ஒவ்வொரு மூடிய கதவும் தோல்வி அல்ல; ஒவ்வொரு தாமதமும் தண்டனை அல்ல; ஒவ்வொரு திருப்பமும் தவறான பாதை அல்ல. சில நேரங்களில் நாம் புரிந்துகொள்ளாத பாதையின் வழியாகவே தேவன் நம்மை அவர் ஆயத்தப்படுத்திய இடத்திற்கு அழைத்துச் செல்கிறார். நாம் அவசரப்பட்டு முடிவெடுப்பதற்குப் பதிலாக, தேவனுடைய சத்தத்தைக் கேட்க கற்றுக்கொள்ள வேண்டும். "உன் முழு இருதயத்தோடும் கர்த்தரில் நம்பிக்கையாயிருந்து, உன் சுயபுத்தியின்மேல் சாயாதிரு. உன் வழிகளிலெல்லாம் அவரை நினைத்துக்கொள்; அப்பொழுது அவர் உன் பாதைகளைச் செவ்வைப்படுத்துவார்." - நீதிமொழிகள் 3:5–6. சில நேரங்களில் நமக்குத் தேவை புதிய பாதை அல்ல; நாம் விலகிச் சென்ற பழைய சரியான பாதைக்குத் திரும்புவதுதான். தேவனுடைய வழிநடத்துதலை ஏற்றுக்கொள்வது என்பது, எல்லாவற்றிற்கும் பதில் தெரிந்த பிறகே அவரை நம்புவது அல்ல. பதில் தெரியாதபோதும், பதிலை அறிந்த தேவனை நம்புவதுதான் விசுவாசம். எந்த பாதையைத் தேர்ந்தெடுப்பது என்று குழப்பமா? எதிர்காலம் குறித்து பயமா? தேவனுடைய சத்தத்தைக் கேளுங்கள். உலகம் “விரைந்து செல்” என்று சொல்லலாம். சூழ்நிலைகள் “இனி வழியில்லை” என்று சொல்லலாம். ஆனால் தேவன், “வழி இதுவே; இதிலே நடவுங்கள்” என்று சொல்லக்கூடும். அவருடைய குரல் கேட்கும் இடத்தில் அமைதி இருக்கும். அவருடைய வழிநடத்துதலைப் பின்பற்றும் இடத்தில் பாதுகாப்பு இருக்கும்.

அவருடைய நேரத்திற்காகக் காத்திருக்கும் இடத்தில் நம்பிக்கை இருக்கும். நாம் செல்லும் பாதை எவ்வளவு சிக்கலானதாக இருந்தாலும், நம்மை வழிநடத்துகிறவர் சரியானவராக இருந்தால், நம் முடிவு நிச்சயமாக நல்லதாக இருக்கும்.

“கர்த்தாவே, நான் செல்ல வேண்டிய வழி எனக்குத் தெரியவில்லை; ஆனால் என்னை வழிநடத்துகிறவர் நீர் என்பதை நான் அறிவேன். என் காதுகள் உமது சத்தத்தைக் கேட்கட்டும்; என் கால்கள் உமது பாதையில் நடக்கட்டும். என நம்மை முழுமையாய் அவரிடம் ஒப்படைப்போம்.

தேவன் காட்டும் பாதையில், தடுமாற்றம் கூட பாடமாக மாறும்; காத்திருப்பு ஆயத்தமாக மாறும்; இறுதியில் பயணமும் சாட்சியாக மாறும். “அறியப்படாத நமது எதிர்காலத்தை, எல்லாம் அறிந்த கர்த்தரிடம் ஒப்படைக்க ஒருபோதும் பயமோ தயக்கமோ வேண்டாம்.