வேத பகுதி: லூக்கா 15:7–24

அமெரிக்காவின் முன்னாள் துணை ஜனாதிபதிகளில் ஒருவரான ஆரோன் பர் (Aaron Burr), தேவபக்தியுள்ள குடும்பத்தில் பிறந்திருந்தாலும், ஆரம்பத்தில் இயேசு கிறிஸ்துவின் அன்பை ஏற்றுக்கொள்ளாதவராக வாழ்ந்தார் என்று கூறப்படுகிறது. அவருடைய தாத்தாவான ஜோனத்தான் எட்வர்ட்ஸ் இயேசுவைப் பற்றி சொல்லிக் கொடுக்க முயன்றபோதெல்லாம், அவர் விலகிச் செல்வாராம்.

வாழ்க்கையில் உயர்ந்த பதவி, புகழ், அரசியல் வெற்றி அனைத்தும் கிடைத்தும் அவரது உள்ளத்தில் உண்மையான மகிழ்ச்சியும் சமாதானமும் இல்லை. கோபமும் தவறான முடிவும் அவரை இருளான வாழ்க்கைக்குள் தள்ளியது. ஆனால் சிறையில் இருந்தபோது திருமறையை வாசிக்கத் தொடங்கினார். அப்போது லூக்கா 15:7,10 வசனங்கள் அவரது இதயத்தைத் தொட்டது. “மனந்திரும்புகிற ஒரே பாவியைக்குறித்து பரலோகத்தில் மிகுந்த சந்தோஷம் உண்டாகும்” என்ற இயேசுவின் அன்பு அவரை முற்றிலும் மாற்றியது. பின்னாளில், “பதவியும் புகழும் தராத மகிழ்ச்சியை, இயேசு தந்த புதுவாழ்வு தந்தது” என்று அவர் மகிழ்ச்சியோடு கூறியுள்ளார்.

அன்பானவர்களே, இது இளைய மகனின் (Prodigal Son) வாழ்க்கையை நினைவுபடுத்துகிறது. தந்தையின் வீட்டை விட்டுச் சென்று, ஆஸ்திகளோடு உலக சந்தோஷத்தைத் தேடியபோது அவனுக்கு கிடைத்தது வெறுமையும் வேதனையும் மட்டுமே. நண்பர்கள் இருந்தார்கள், பணம் இருந்தது, சுதந்திரம் இருந்தது—ஆனால் நிம்மதி இல்லை. எல்லாம் இழந்தபோது தான், “என் தந்தையின் வீட்டில் எவ்வளவு ஆசீர்வாதம்!” என்று உணர்ந்தான். திரும்பி வந்தபோது தான் அவன் உண்மையான மகிழ்ச்சியையும், மன்னிப்பையும், புதிய வாழ்வையும் பெற்றான். தந்தை அவனைத் தள்ளிவிடவில்லை; மாறாக ஓடிவந்து அணைத்துக்கொண்டார் (லூக். 15:20–24).

இன்றும் பலர் பணம், பதவி, வெளிநாடு, சமூக ஊடகம், உலக இன்பங்கள், தவறான உறவுகள் ஆகியவற்றில் மகிழ்ச்சியைத் தேடுகிறார்கள். கையில் எல்லாம் இருப்பது போலத் தோன்றினாலும், உள்ளத்தில் வெறுமை, பயம், சமாதானமின்மை காணப்படுகிறது. காரணம் என்ன? தேவனை விட்டுத் தூரமாக வாழும் வாழ்க்கை ஒருபோதும் நிறைவைத் தராது.

ஆனால் நல்ல செய்தி என்னவென்றால்—இன்று நாம் எவ்வளவு தூரம் விலகியிருந்தாலும், திரும்பி வந்தால் ஆண்டவர் நம்மை ஏற்றுக்கொள்வார். “எவனொருவன் கிறிஸ்துவுக்குள் இருக்கிறானோ அவன் புதுச் சிருஷ்டியாய் இருக்கிறான்.” (2 கொரி. 5:17). உலகம் தராத மகிழ்ச்சி, மனிதர் தராத சமாதானம், பாவம் கெடுக்காத புதுவாழ்வு—இவை அனைத்தையும் இயேசுவால் மட்டுமே பெற முடியும்.

சாரோனின் ரோஜாவும், பள்ளத்தாக்கின் லீலியுமான நம் ஆண்டவர் இயேசு கிறிஸ்து, நமக்குப் புதுவாழ்வு தருவதற்காக கல்வாரி சிலுவையில் உடைக்கப்பட்டார். இன்று அவரிடத்தில் திரும்பி வருவோம்; அவர் தரும் உண்மையான மகிழ்ச்சியையும் சமாதானத்தையும் பெற்றுக்கொள்வோம்.

ஜெபிக்க

மணிப்பூர் மாநிலத்திற்காக ஜெபிப்போம். அங்குள்ள கிறிஸ்தவர்கள் பாதுகாக்கப்படவும், எந்த ஒரு வன்முறைகளும் ஏற்படாதபடிக்கு கர்த்தர் சமாதானத்தை தர ஜெபிப்போம்.